„Erum stolt af þér og þínu liði“

Alfreð Gíslason landsliðsþjálfari Þýskalands í handknattleik karla. Mynd/EPA

„Alfreð, ég og fjöldi annarra stöndum þétt við bakið á þér,“ segir Joachim Löw, landsliðsþjálfari Þýskalands í knattspyrnu karla í yfirlýsingu sem birtist í þýskum fjölmiðlum eftir að Alfreð Gíslason, þjálfari þýska karlalandsliðsins í handknattleik, greindi frá því að honum hafi borist hótunarbréf í pósti.


„Þú ert frábær þjálfari og við erum stolt af þér og þínu liði,“ sagði Löw ennfremur og minnti á nauðsyn þess að Þjóðverjar standi saman og gæti vel hver að öðrum.


Löw segir óviðurkvæmilegt til þess að vita að til sé fólk sem gangi fram með hótunum af þessu tagi. „Ég óska þess að sá sem sendi hótunina finnist og svari til saka.“


Martina Voss-Tecklenburg, þjálfari kvennalandsliðsins í knattspyrnu, tók í sama streng og sagði hótanirnar vera lítilmannlegar. „Þú átt alla okkar virðingu og stuðning,“ sagði Voss-Tecklenburg og beindi orðum sínum til Alfreðs.


Andreas Michelmann, forseti þýska handknattleikssambandsins, fordæmdi hótunina í gær og sagði sambandið og þýskan handknattleik standa sem órofa heild að baki Alfreðs. Fjöldi handknattleiksfólks og félaga lýsti yfir stuðninig við Alfreð á samfélagsmiðlum eftir að hann greindi frá hótuninni á Instagramsíðu sinni í gærmorgun.

a>
- Auglýsing -

Nýjustu fréttir

- Auglýsing -