Grunur leikur á um veðmálasvindl í Meistaradeildinni

Mynd/Egill Bjarni Friðjónsson

Sterkur grunur leikur á um að úrslitum hafi verið hagrætt í tengslum við veðmál í leik í Meistaradeild Evrópu í handknattelik karla á fyrri hluta keppnistímabilsins í haust eða í vetur. Frá þessu er greint á sænsku handknattleikssíðunni Handbollskanalen. Síðan segist hafa traustar heimildir fyrir þessu úr tveimur áttum og eru leikmenn annars liðsins bendlaðir við sóðaskapinn.

Þar kemur einnig fram að grunur leiki á um að úrslitum fleiri leikja í Evrópukeppni félagsliða á keppnistímabilinu hafi verið hagrætt. Kemur fram að hið minnsta einn leikur í Meistaradeild kvenna og viðureign í Evrópudeild karla liggi undir sterkum grun.


Ekki kemur fram um hvaða leiki er að ræða en umrædd viðureign í Meistaradeild karla sem kastljósið beinist að mun hafa lokið með sex marka mun.

Veðmálasvínerí virðist vera vaxandi vandamál í handknattleik eins og í fleiri íþróttagreinum. Ekki eru nema nokkrar vikur síðan upp komst að stór hluti rússneska U18 ára landsliðs karla tók þátt í að hagræða úrslitum leikja sinna á Evrópumeistaramótinu sem fram fór í Króatíu í ágúst. Voru höfuðpaurarnir dæmdir í langt keppnisbann auk sekta hjá rússneska handknattleikssambandinu.


Nánar er má lesa um þetta í frétt Handbollskanalen hér.

- Auglýsing -

Nýjustu fréttir

- Auglýsing -