Grótta hefur tilkynnt forráðamönnum Kríu að þeir fá ekki tíma í íþróttahúsinu á Seltjarnarnesi, Hertzhöllinni, á næsta vetri til þess að stunda æfingar og keppni í Olísdeild karla. Daði Laxdal Gautason, leikmaður Kríu og einn forsvarsmanna liðsins, staðfesti þetta við handbolta.is í kvöld en handbolti.is sagði frá stöðunni samkvæmt heimildum fyrr í vikunni.
Kría vann sér í vor sæti í Olísdeildinni í fyrsta sinn. Liðið lék heimaleiki sína í Hertzhöllinni á nýliðnu keppnistímabili auk þess sem það stundaði æfingar í húsinu.
Grótta segir að ekki séu lausir tímar til afnota fyrir Kríu vegna vaxandi starfsemi Gróttu sem m.a. ætlar að halda úti þremur meistaraflokksliðum á komandi vetri auk þess að halda út öflugu starfi hér eftir sem hingað til í yngri flokkum.
„Þessi niðurstaða er mjög mikil vonbrigði fyrir okkur og sérstaklega þá sem eru fæddir og uppaldir á Nesinu og hafa og farið í gegnum starf Gróttu. Niðurstaðan er því heimilislausir Kríumenn með sæti í efstu deild karla,“ sagði Daði, í skilaboðum til handbolta.is í kvöld.
Óvíst er í hvað hús Kríuliðið á að venda enda eru flest ef ekki öll íþróttahús á höfuðborgarsvæðinu vel nýtt frá morgni til kvölds.
Þar með er þátttaka Kríu í Olísdeild karla á næsta keppnistímabili í ákveðnu uppnámi um þessar mundir þar sem liðið hefur hvorki æfinga- né keppnishús en hinsvegar keppnisleyfi í Olísdeildinni. Þeir auglýsa nú eftir bæjarfélagi sem vill fá lið í Olísdeild karla.
Kríu vantar heimili!
— Kría – Handbolti (@KHandbolti) June 24, 2021
Eftir 2 góð ár fengum við þær fréttir í hádeginu frá @Grottahandbolti að ekki væri pláss fyrir okkur á Nesinu. Við þökkum Gróttu fyrir samstarfið og góðar minningar.
Við hefjum nýtt upphaf annarsstaðar.
Hvaða lið/bæjarfélag vill lið í Olís deildinni? 😅 pic.twitter.com/VKz9HGdBX9
