Kveður HK og fer til Noregs

Elías Már Halldórsson kveður nú HK sem Olísdeildarlið. Mynd/Fjölnir, Þorgils G.

Elías Már Halldórsson, þjálfari karlaliðs HK og yfirþjálfari handknattleiksdeildar hefur verið ráðinn þjálfari úrvalsdeildarliðs Fredrikstad Bkl í kvennaflokki. Tekur Elías Már við starfinu í sumar og kveður þar með HK eftir tveggja ára starf.

Frá þessu er greint í vefútgáfu Fredrikstad Blad í morgun.

Fredrikstad Bkl situr í 8. sæti af 13 liðum norsku úrvalsdeildarinnar um þessar mundir en keppni í deildinni hefur legið niðri síðan upp úr miðjum janúar.

Ágúst Þór Jóhannsson, þjálfari kvennaliðs Vals og aðstoðarþjálfari Vals, var orðaður við starfið hjá Fredrikstad Bkl á dögunum.

Elías Már þekkir vel í norskum handknattleik því hann lék um tveggja ára skeið með ÖIF Arendal fyrir nokkrum árum.

Elías Már stýrir HK út leiktíðina en liðið vann ævintrýralegan sigur á Víkingi í toppslag Grill 66-deildar karla í gærkvöld.

- Auglýsing -

Nýjustu fréttir

- Auglýsing -