Saga Sif Gísladóttir kemur inn í íslenska landsliðið í dag gegn Svíum í stað Hafdísar Renötudóttur.Mynd/Ívar

Haukar og Valur skildu jöfn, 19:19, í hörkuleik í Olísdeild kvenna í handknattleik í Schenkerhöllinni á Ásvöllum í kvöld í jöfnum leik. Valur er þar með í öðru sæti deildarinnar stigi á eftir KA/Þór sem er á toppnum með 12 stig eftir átta leiki. Haukar er komnir upp í fimmta sæti með sjö stig og hafa ýtt ÍBV niður í sjötta sætið.

Haukar voru ekki fjarri því að fara með bæði stigin úr leiknum. Liðið átti síðustu sóknina en tókst ekki að færa sér hana í nyt.


Leikurinn í Schenkerhöllinni í kvöld var afar jafn frá upphafi. Vart mátti á milli sjá milli liðanna og sjaldnast var munurinn meiri en eitt mark. Eftir jafna stöðu í hálfleik, 11:11, þá byrjuðu Haukar síðari hálfleikinn betur og náðu um skeið tveggja marka forskoti, 16:14. Um síðir náði Valsliðið þremur mörkum í röð og var yfir, 17:16, þegar tíu mínútur voru til leiksloka.
Leikurinn var fremur slakur. Varnarleikurinn var þó í aðalhlutverki hjá báðum og markverðirnir Annika Friðhem Petersen, Haukum, og Saga Sif Gísladóttir hjá Val voru í stórum hlutverkum. Leikmenn gerðu sig hinsvegar seka um mörg einföld mistök auk þess sem meiri kraft og áræðni vantaði á tíðum.

Þeir yfirburðir sem Valur hafði í fyrri leik liðanna í fyrstu umferð í september voru víðsfjarri að þessu sinni. Haukar hafa mjög bætt sig og leika nú orðið góða vörn. Gunnar Gunnarsson og Díana Guðjónsdóttir virðst vera að vinna afar gott verk með liðið.


Mörk Hauka: Karen Helga Díönudóttir 5, Sara Odden 5, Berta Rut Harðardóttir 3, Elín Klara Þorkelsdóttir 2, Rakel Sigurðardóttir 1, Guðrún Jenny Sigurðardóttir 1, Birta Lind Jóhannsdóttir 1, Ragnheiður Ragnarsdóttir 1.
Varin skot: Annika Friðheim Petersen 11 skot, 37,9%.
Mörk Vals: Lovísa Thompson 5, Mariam Eradze 4, Þórey Anna Ásgeirsdóttir 4, Lilja Ágústsdóttir 3, Hulda Dís Þrastardóttir 1, Ragnhildur Edda Þórðardóttir 1, Thea Imani Sturludóttir 1.
Varin skot: Saga Sif Gísladóttir 12 skot, 38,7%.

- Auglýsing -

Nýjustu fréttir

- Auglýsing -