„Undanfarnir dagar hafa verið okkur afar mikilvægir til að búa okkur undir komandi vikur og mánuði, breyta og bæta margt og koma með nýjan hugmyndir. Tilbreyting frá því sem oftast er þegar komið er saman nokkrum dögum fyrir leik og farið er yfir það nauðsynlegasta,“ sagði Arnar Pétursson, landsliðsþjálfari kvenna í handknattleik, þegar handbolti.is hitti hann við upphaf síðustu æfingar kvennalandsliðsins í lok á nærri viku æfingatarnar.
Æft var tvisvar á dag alla dagana auk þess sem lagt var á ráðin á fundum. Fyrri hluta æfingavikunnar var landsliðshópurinn saman í Vestmannaeyjum þar sem Arnar býr og starfar.
Fínir dagar í Eyjum
„Æfingavikan hefur verið mjög góð. Við áttum saman fína daga í Eyjum þar sem leikmennirnir dvöldu á hóteli og gátu einbeitt sér að æfingum og fundum. Við náðum hópnum afar vel saman,“ sagði Arnar.
Kærkomin tilbreyting
Landsliðið kom síðasta saman í apríl þegar tveir síðustu leikirnir í undankeppni Evrópumótsins fór fram, gegn Svíum hér heima og á mót Serbíu ytra.
„Nú vorum við bara að æfa og spá í það sem við erum að gera. Ég held að þetta sé nánast í fyrsta skipti síðan ég tók við sumarið 2019 sem við náum svona mörgum dögum saman þar sem einbeitingin er öll á því sem við erum að gera og ætlum að gera,“ sagði Arnar sem sér fram á fyrstu keppnisleiki tímabilsins sem verða við landslið Ísraels á Ásvöllum 5. og 6. nóvember á Ásvöllum.
Tveir vináttuleikir
Leikirnir við Ísrael eru sérlega mikilvægir en sigurliðið úr þeim kemst í umspilsleiki vegna næsta heimsmeistaramóts sem haldið verður í desember 2023. Umspilsleikirnir fara fram í vor. Áður en að leikjunum við Ísrael kemur mætir íslenska landsliðið færeyska landsliðinu í tveimur vináttuleikjum í Þórshöfn 29. og 30. október. Færeyska landsliðið á einnig fyrir höndum leiki í forkeppni HM í nóvember.
„Við komum aftur saman til æfinga í upphafi síðustu viku þessa mánaðar. Æfum nokkrum sinnum saman áður en farið verður til Færeyja föstudaginn 28. október. Leikirnir við Færeyinga eru afar kærkomnir. Síðan taka við leikirnir við Ísrael. Það er spennandi tímar framundan hjá okkur,“ sagði Arnar Pétursson landsliðsþjálfari í samtali við handbolta.is í gær.
