„Við stóðumst pressuna í lokin, sem betur fer,“ sagði Valgerður Ýr Þorsteinsdóttir, annar af tveimur markahæstu leikmönnum HK í sigurleiknum á Stjörninni í 3.umferð Olísdeildar kvenna í TM-höllinni í kvöld, 25:23. Valgerður Ýr innsiglaði sigurinn með sjötta markinu sínu í leiknum nokkrum sekúndum fyrir leikslok eftir að Stjarnan hafði brugðið á það ráð að leika maður á mann.
„Við tókum leikhlé þar sem rætt var um að vera rólegar á boltann og sækja á markið og láta þannig tímann líða. Okkar áætlun gekk upp,“ sagði Valgerður Ýr brosti breitt yfir fyrsta sigri HK í deildinni á leiktíðinni.
„Við vissum að leikurinn gæti orðið sveiflukenndur og sú var raunin enda um tvö jöfn lið að ræða sem eru að berjast um sætin í efri hluta deildarinnar. Sem betur fer féll sigurinn okkur í skaut og það skal viðurkennt að það er ákveðinn léttir að ná í fyrstu stigin. Það hefði verið verra að fara inn í hléið sem nú kemur í deildinni og vera án stiga,“ sagði Valgerður og minnti á að HK hafi mætt sterkum andstæðingum í upphafi, Fram, ÍBV og nú Stjörnunni.
„Við vorum vonsviknar að hafa ekki fengið annað stigið á móti Fram af því að við lékum vel, að eigin mati. Sóknarleikurinn var hinsvegar ekki nógu góður gegn ÍBV um síðustu helgi. Við vorum staðráðnir í að gera betur á öllum sviðum í dag og það tókst,“ sagði Valgerður Ýr Þorsteinsdóttir sem var markahæst í liði HK í dag með sex mörk eins og Díana Kristín Sigmarsdóttir.
