Arnar Daði Arnarsson, þjálfari Gróttu fyrir miðri mynd. Mynd/Eyjólfur Garðarsson

„Leikur okkur byggist að mjög miklu leyti upp á vörn og markvörslu, satt að segja var ég ekki alltof vel undir það búinn að Aron Kristjánsson myndi láta Hauka leika sjö á sex á okkur allan leikinn sem riðlaði varnarleik okkar. Aron er klókur þjálfari,“ sagði Arnar Daði Arnarsson, þjálfari Gróttu, eftir að lið hans fékk slæman skell fyrir Haukum í Olísdeildinni í gærkvöld, 27:15.


„Okkur tókst að halda Haukum í 20 mörkum í fyrri leiknum og eins Selfossi á dögunum. Aron kom með krók á móti bragði að þessu sinni. Þegar engin spenna er í leiknum þá heldur hann því áfram til loka, hafði enga ástæðu til þess að breyta til. Sú staða var verulega íþyngjandi fyrir okkur. Það er erfitt að leika manni færri í vörninni allan leikinn. Mínir menn voru þar af leiðandi ekki klárir á hvernig ætti að bregðast við,“ sagði Arnar Daði.


„Því miður leið mínum mönnum ekki nógu vel inni á leikvellinum. Ástæðan er sú að Haukar komu okkur á óvart með sjö manna sóknarleik. Við erum ungt og óreynt sem er vel búið undir leiki. Þegar okkur er komið á óvart eins og Haukar gerðu að þessu sinni þá eru menn slegnir út af laginu.


Önnur möguleg skýring er kannski sú að menn telji sig vera orðna betri en þeir eru eftir tvo góða leiki upp á síðkasti sem hefur skilað sér í miklu lofi á þá. Haukar eru bara frábærir og gerðu þetta vel. Eftir Selfoss leikinn þá gaf ég mönnum tveggja daga frí og þetta er það sem ég fæ til baka. Kannski verð ég að endurskoða þá stefnu mína,“ sagði Arnar Daði Arnarsson, þjálfari Gróttu sem situr í 10. sæti deildarinnar með níu stig eftir 12 leiki, er þremur stigum á eftir Fram sem er í 9. sæti.

- Auglýsing -

Nýjustu fréttir

- Auglýsing -