Stjórn Handknattleikssambands Íslands lagði blessun sína yfir þá uppstokkun á leikjadagskrá sem samþykkt var á formannafundi sambandsins fyrir hádegið og greint var frá handbolta.is fyrr í dag. Um leið sendi stjórnin frá sér yfirlýsingu þar sem m.a. segir að fyrri ákvörðun um leikjaniðurröðun hafi verið tekin með tilliti til sjónarmiða formanna félaganna sem komu fram á fundi fyrr í vikunni.
Jafnframt harmar stjórnin stóryrtar yfirlýsingar leikmanna og þjálfara síðustu daga sem ekki hafi verið í samræmi við við sjónarmið félaganna sem þeir starfa hjá.
Yfirlýsingu stjórnar Handknattleikssambandsins er hægt að lesa hér fyrir neðan:
„HSÍ hefur tekið ákvörðun um að breyta leikjafyrirkomulagi Íslandsmótsins í Olís deild karla að beiðni formannafundar HSÍ.
Fyrri ákvörðun var tekin að teknu tilliti til sjónarmiða formanna félaganna um að byrja ekki of fljótt vegna meiðslahættu og að ekki yrði spilað í landleikjahléi til að gæta jafnræðis milli félaga.
Á formannafundi í dag óskuðu félögin í ljósi umræðu undanfarna daga að falla frá framangreindum sjónarmiðum og hefja deildina skv. fyrri tillögu HSÍ og jafnframt spila í landsleikjahléi, sem alla jöfnu er ekki gert en í ljósi ástandsins í þjóðfélaginu verður horft fram hjá því.
Stjórn HSÍ hefur fallist á þessa ósk og mun mótið hefjast að nýju þann 22.apríl nk. Deildinni mun því ljúka viku fyrr en áætlað var eða þann 27. maí og tekur þá við 8 liða úrslitakeppni.
HSÍ harmar þá neikvæðu umræðu sem hefur verið síðast liðna daga og stóryrtar yfirlýsingar þjálfara og leikmanna sem voru ekki í samræmi við sjónarmið félaganna sem þeir starfa hjá.“
