Víkingar slá ekki slöku við

Ester Inga Ögmundsdóttir. Mynd/Víkingur

Víkingar slá ekki slöku við að búa kvennalið sitt undir næsta keppnistímabil í Grill66-deild kvenna. Fjórði leikmaðurinn sem lék með liðinu á nýliðnu keppnistímbili í deildinni hefur skrifað undir nýjan tveggja ára samning. Er þar um að ræða Ester Ingu Ögmundsdóttur.


Ester, sem er 20 ára leikstjórnandi og skytta, er uppalin í Víking og hefur leikið með félaginu allan sinn feril og hefur skorað 159 mörk í deildarkeppni fyrir Víking.


„Ester er gríðarlega hraður og kraftmikill leikmaður sem skoraði 69 mörk fyrir Víking á síðasta tímabil og var með langflest fiskuð víti í liðinu eða um 25 talsins. Ester endaði tímabilið einnig með frábæra skotnýtingu en hún nýtti um 69% skota sinna og var með um 5 löglegar stöðvanir í leik. Það er mikill fengur fyrir Víking að halda henni innan okkar raða og hlökkum við til að fylgjast með henni vaxa með félaginu,“ segir í tilkynningu frá handknattleiksdeild Víkings.


Á dögunum var gengið frá nýjum samningum við Auði Brynju Sölvadóttur, Ídu Bjarklind Magnúsdóttur og Örnu Þyrí Ólafsdóttur eins og greint hefur verið frá á handbolta.is.


Eftir því sem næst verður komist ætla Víkingar ekki að láta hér við sitja og mun vera von til frekari fregna úr herbúðum félagsins á næstunni.

- Auglýsing -

Nýjustu fréttir

- Auglýsing -